Saturday, May 13, 2006

u don't talk about fught club



لاننا لازلنا فى اسبوع فيلم الافتتاح (fight club ) و تكمله على كلام الزميل zengy لان ده بروتكول هذه المدونة .. هاتكلم على الفيلم العبقرى ده و تحديدا عن اخراجه
الفيلم من اخراج David Fincher صاحب الاسلوب المميز فى تعاملة مع (الاشياء الثابتة) اللى بتشكله اهتمام كبير جدا .. و ده كان مفيد جدا فى الفيلم ده اللى بينادى بنبذ الحياة الاستهلاكية و التخلص من عبوديتك للكماليات
فتلاقى عنده مجموعة من اللقطات ابطالها اشياء بتقول حاجة بشكل واضح جدا .. خاصة فى الجزء اللى بيشرح حياة جاك و ادمانة لامتلاك اشياء ليست مفيدة بالمرة









برضة ده بيكون واضح جدا فى مشهد شرح سبب انفجار منزل جاك .. بيختار المخرج انه يمشى بلقطات مقربة سريعة مع خط الغاز الخارج من البوتاجاز حتى شرارة الثلاجة التى تسبب الانفجار بشكل ممتع فعلا .. و ده كرره نفس المخرج فى فيلمة الاخر Panic Room بس يمكن كان مبالغ فيه شويه بعكس fight club لان القصة هنا كانت سامحه بكدة






فى بدايات الفيلم نبدأ بالتعرف على جاك كشخص مصاب بالارق .. و يذكر الراوى بعض الجمل اللى بعتبرها معبرة جدا عن انسان مش قادر ينام

With insomnia nothing is real .. Every thing is a copy of a copy of a copy
when u have insomnia your never really asleep and your never really awake




بتبدأ مشكلة الارق تنتهى مع جاك عند اكتشافة لمجموعات العلاج اللى بيدمنها .. حتى ظهور الشخصية المرعبة بالنسبه له مارلا .. اللى تمثلها بعبقريه Helena Bonham Carter فى دور عمرها ..




ثم يظهربعد ذلك تايلر دردن صاحب الكاريزما العظيمة و يطلب من جاك ان يلكمة ... و يثبت الكادر ليحكى الراوى ماضى تايلر المهنى العجيب .. و فى احد اعماله كمشغل اله العرض السينمائى يشرح الراوى علامة حرق السيجارة فى الكادرات التى تسبق تغيير بكرة الفيلم و كيف يضع تيلر لقطات بورنو بين بكرتين اثناء عرض الفيلم .. ليظهر مشهد ساخن جدا فى وسط فيلم عائلى برئ .. و يقول ان المشاهد فى هذة الحاله يشعر بانه شاهد شئ ما ولكنه ليس متأكد مما رأه





المفاجاه بقى ان مخرج الفيلم عمل كده فعلا معانا (المشاهدين) .. ايوة الراجل ده أشتغلنا كلنا يا جماعة ..
بالمناسبة لم الاحظ هذه الملاحظة الا فى مشاهدتى الاخيرة للفيلم عشان اكتب عنة .. و الطريف ان الزميل( دقيق الملاحظه) سولو لاحظ نفس الملاحظه فى نفس الوقت .. و تبادلنا بعض الكلمات (اللطيفة) اللى تبان قباحة بس هى مدح :-)

الاشتغاله بقى هى ان المخرج فعلا ملزق كدرات فى الفيلم ما تقدرش تشوفها فى الفيلم ابدا الا لو مشيته كادر كادر .. ابن المجنونه حاطت كذا كادر ( يعنى 1/24 من الثانيه) لتايلر قبل ظهورة فى الفيلم بشكل صريح كتمهيد لحاله الانفصام الى بيمر بيها جاك .. و بنفس المنطق اللى بيعلنه بعدين .. انت هاتشوف الكادرات دى بس مش ها تقدر تجزم انك شفتها او شفت ايه بالظبط
الكادرات التاليه لم تراها من قبل فى هذا الفيلم




تنتشر فكرة نادى القتال بين الرجال الباحثين عن متنفس لاخراج الطاقة و نبذ المجتمع الاستهلاكى .. و يقابل جاك صديقة بوب (المغنى Meat Loaf ) الذى كان يبكى فى حضنه فى اجتماعات العلاج .. ليرتمى فى حضنه هذة المرة اثناء قتالهم




مش هاقدر انهى الكلام فى الفيلم ده من غير ما أشير لاداء المجرم ل Edward Norton خاصه فى المشهد اللى بيبطح نفسه على المدير .. كم ضرب لنفسة و تعبيرات فزع فى مونولوج عبقرى


19 comments:

Solo said...

مفيش بعد قولك يا شباك
انت قلت اللى عايز أقوله يا مجرم لو جيت اكتب عن الفيلم دا
:)

هابدأ انا البروجرام الجاى بقى

haisam (jarelkamar) said...

اولا عاجبني جدا ديزاين البلوج .. ياعماد انت تحترف في الكارير بتاع تصميم اللبلوجات ده .. بجد
و بعدين السفاح اللي بيختار كلام زي : فلافل و جومه و طماطم .. و كابتن حلو الفيلم .. يستاهل تمثال .. لو انت برضه يا عماد يبقى ليك عندي بوسه :-))

..
ياولاد الايه .. مستحيل كنت اخد بالي من الكادرات اللي في نص الفيلم دي .. او حتى من طفية السجاير ..اهي دي احلى حاجه في انك تتكلم في الفيلم مع حد بعد ماتشوفه .. عندي فكره لطيفه .. اعلنوا عن الفيلم اللي حاتتكلموا فيه قبليها باسبوع مثلا .. عشان اكبر عدد يشوفه .. بعدين كل واحد فيكوا يتكلم عنه من وجهة نظره .. و تبعتوا الموضوع في بوست واحد و نقعد كلنا نتكلم و نتناقش, متهبألي كده افيد .و شوف بقى لو سبتوا اللينك بتاع توررينت الفيلم .. عشان اللي عايز ينزله .. طبعا الكلام ده في الافلام الجديده .. الافلام النادره و اللي عند ناس زي سولو مثلا و مش عايز يطلعها يبقى احكوهالنا بقى .. و لا الحوجه للي يسوى و اللي يسوى برضه
:-)))
....
كملوا بقى و ماتوقفوش في النص و حياة اهاليكم .. سامع يا صولو ؟؟

Zengy said...

ليك عنده بوسة يا عماد :D
و عند ناس كتير قوي صدقني

Sherif Nagib said...

كلام جميل جدا و تناولت نقاط هامة في الفيلم ، الحقيقة أنا سعيد جدا بهذه المدونة و فكرة إن الفيلم بيشتغل اسبوع و كلكم تكتبوا عليه. و عجبني تناولك للنواحي الفنية فيه.
بالنسبة لظهور براد بيت المتكرر ، فدي اللي بيقولوا عليها أهل المونتاج و السينما :
subliminal cuts
و بتوع علم النفس بيقولوا عليها
subliminal messages
و استخدامها واسع جدا في عالم السينما و الاعلانات و حتى الحملات الانتخابية أنقر هنا

أول ظهور لبراد بيت في الفيلم ماكانش مستخبي في المونتاج ، و إنما ظهر على شاشة التلفزيون و هو بيرحب بـ إدوارد نورتون مع بقية الجارسونات في الاعلان اللي كان شغال على تلفزيون الفندق .

أوضح لقطة لظهوره و أظن و الله أعلم أنها أطولها استقرارا و لأنها جاءت في المكان الصحيح تماما هي الصورة الثالثة في مجموعة الصور اللي بتتكلم عن موضوع الظهور ، بعد مابيكتشف إدوارد إنه خلاص.. شخصية هيلينا خربت عليه هذا المهرب و مابقاش حاينفع تاني. بيقوم باصص وراه في الشارع ناحية براد بيت.. كأنه بيبص الناحية التانية عشان يدور على المهرب التالي لأرقه و بيظهر له براد بيت بشكل شبه واضح جدا .

بالمناسبة هناك
subliminal cut
في أخر الفيلم وسط انفجارات المباني تصور عضو ذكري بملئ الشاشة و يختفي علطول و بعدها الفيلم يخلص.

تركيزك على الأدوات الاستهلاكية في الفيلم عجبني جدا و نقطة تستوجب الطرح فنيا.

و أخيرا ملحوظة لا تخلو من التذحلق.. عنوان التدوينة مفروض يكون
you DO NOT talk about
و ليس
don't
لأنها تفرق جامد .

أنا ماعرفش ايه حكاية "ماتقفوش في النص" دي اللي بيتكلم عنها هيثم .. يظهر إنه عارف حاجة.. بس حيث كده انا كمان باقول لكم ماتقفوش عشان المدونة جامدة و التصميم جميل جدا.

Alexandra said...

فكرة الأعلان عن الأفلام قبل مناقشتها عاجباني. بس يا هيثم سولو بيسلف افلام والله وكريم في ده كمان. انت يمكن بس ما بترجعش الي بتاخده أو ما بتعرفش تطلبها كويس

haisam (jarelkamar) said...

شريف نجيب : الف شكر على المعلومه .. فعلا حاجه اول مره اسمع عنها .. و اللينك اللي انت حطيته غني جدا و مهم .. و طالع منه لينكات لمواقع بتشرح الموضوع بالتفصيل .. و استخداماته و اثبات تأثيره بالتجارب العلميه ... شكرا تاني يا شريف

ماخدتش بالش من العضو الذكري .. مممكن الشباب اخدو بالهم بس مارضوش يحطوا الكادر .. عشان الحشمه :-)))

الكسندرا : انتي ايه يعني بتهدي النفوس ؟؟ و كمان كريم في تسليفهم ؟؟عامة انا ماخدتش منه حاجه قبل كده عشان مارجعهاش .. امممم ماعدا سناتش يعني

:-)))

..
يعني ايه بقى مش بعرف اطلبهم كويس ؟؟؟ هوه ليها طريقه مخصوص اتقدم بيها ؟؟

قوليلي عليها مكن تنفع
:-))))

Solo said...

ماعدا سناتش ؟
واد يا هيثم ... خللى بالك من نفسك

Ghada said...

البوست جامد

الفيلم ده أصلاً فيلم صاااايع

فيلم بيحمل فلسفة عميقة وفي نفس الوقت ميتزهقش منه، تتفرج عليه مرة واتنين وتلاته، وكل مرة تكتشف حاجه، يبقى ايه؟؟؟

AZ said...

فى كادر كمان بيطلع فيه جاك ساعه اما نورتون بيقول
everything is a copy of a copy of a copy :)

mindonna said...

جميل طريقة نقدك للفيلم و تنقيتك للقطات
شغل ناس مش هواة ;)

S H E B A K said...

solo
اشطة يا بييه .. اطلع طلعتك بقى .. انا متأكد انها ها تبقى فشيخة

haisam
الحقيقة رغم طمعى فالبوسة الا ان الجمل دى كانت تفكير جماعى
الفكرة بتاعت قريبا دى كانت ظريفة شكرا يا بيه

zengy
امم .. بس يابابا

sherif nagib
تعليقك عجبنى جدا واضح انك ليك فى اللعبة جامد.. الينك اللى حطيتة مفيد جدا ..و الطريف ان اسمة (الاختناق بالفشار) .. شكرا بجد
ياريت نشوفك ديما فالكيس

alexandra
عملنا كده فعلا يا فندم شكرا للاهتمام

ghada
فيلم مش سهل تماما

AZ
امممم .. فعلا .. فاتتنى دى

mindonna
احنا بس مديين الشغل حقه شوية يا فندم

tona said...

الفيلم فعلا تحفة
فكرتة اساسا هايلة ، والطريقة اللي اتنفذ بيها عبقرية
واكثر مشاهد عجبتني هي اللي كانت بتصور معاناة جاك النفسية لما بيكتشف انة هو تايلر وان التصرفات والافكار دي كانت ناتجة عنة هو نتيجة الانفصام اللي كان بيعاني منة

ahmad said...

صباح الخير....
بصفتي من عشاق الفيلم الكبار - حيث أنني للمرة الوحيدة في حياتي دخلته مرتين في السيما ورا بعض!- قلت أزوّد شوية إنطباعات من عندي ، و هي متعلقة بالفيلم و الرواية ، طبعا أنا أول ما قريت في التترات إن الفيلم مأخوذ عن رواية لحد ما اعرفوش ، ما كدبتش خبر ، جبتها و قريتها ، و فوجئت بمدى الترابط بين الفيلم و الرواية - رغم إنهم بعاد جدا عن بعض!!
و عشان أوضح إنبهاري جه من إيه ،
شوف في مشهد حرق إيد نورتون بـ "القبلة الكيماوية"، شوف في الرواية مكتوب إزاي:
Picture the fire still burning, except now it's beyond the horizon. A sunset.
"Come back to the pain," Tyler says.
This is the kind of guided meditation they use at support groups.
Don't even think of the word pain.
Guided meditation works for cancer, it can work for this.
"Look at your hand," Tyler says.
Don't look at your hand.
Don't think of the word searing or flesh or tissue or charred.
Don't hear yourself cry.
Guided Meditation.
You're in Ireland. Close your eyes.
You're in Ireland the summer after you left college, and you're drinking at a pub near the castle where every day busloads of English and American tourists come to kiss the blarney stone.
"Don't shut this out," Tyler says. "Soap and human sacrifice go hand in hand."

الغريبة إن الور إللي الراوي كان بيحطها في دماغه ( الحلرائق - الحدائق - كلمات الألم - اللحم .. إلخ) مذكورة بالشكل نفسه في الرواية في نطاق أدبي ، و مش عارف إزاي فسر ده للقطات سريعة لنفس الأشياء ، و بنفس الروح...
أنا أعتقد إن الفيلم ده من أنجح الأفلام إللي اقتبست عن روايات ، رغم التغيير الكبير ، لكن نفس روح الرواية بشكل مدهش!

الرواية و ضعتها هنا في شكل بي-دي-إف ، على سبيل القرصنة ، تايلر مش حيمانع

Solo said...

أنا فاكر ان تشاك بولنياك قال ان الرواية اتنفذت بأحسن ما يكون على ايد ديفيد فينشر و ماكنش يطمح فى اكتر من كده
بس مش عارف ليه كنت اتمنى تبقى نهاية الفيلم زى نهاية الرواية بالظبط
كنت اتمنى ان ادوارد نورتون يتعالج عن طبيب نفسى

Sherif Nagib said...

هناك اختلافات أخرى بين الرواية و الفيلم بخلاف النهاية ، ففي البداية مثلا تم تغيير طريقة المقابلة بين تايلر و جاك (أو الراوي كما يسميه البعض) ..و في الدي في دي الخاص بالفيلم الذي أصدر ضمن سلسلة
collector's edition
هناك تعليق صوتي على الفيلم بين السيناريست و المؤلف يمكنك تشغيله ، و قد استمعت لجزء منه و كان المؤلف أبدى سعادته باختيار السينارست في تغيير طريقة المقابلة و في اختصار بعض الأشياء كي يليق الفيلم بالسينما .

ahmad said...
This comment has been removed by a blog administrator.
ahmad said...

بجد؟!؟ الـ
collector's edition
فيها كده؟!؟

مش باقول لكم المدونة دي مفيده؟؟

:)

mahmoud said...

أولا أنا أول مرة أعدى على المدونة دى , و بصراحة برفع " الكبعة" تقديرا ليها

ثانيا
fight clu b !!!!
جيت ع الحتة الحساسة عندى , الفيلم ده من كتر احترامى له عملت
presentation
مرة عليه , جمعت ناس صحابى و قعدنا شغلنا الفيلم و فى الآخر قعدناا نتكلم عليه , الفيام تقيل قوى و مليان , و كل شوية بتبان فيه حاجات أك, و لو حد يحب يشوف الفيلم بطريقة تانية خالص يقرا كتاب المسيرى " العلمانية الجزئية و العلمانية الشاملة" و حيلاقى دنيا تانية خالص فى الفيلم
ثالثا : بشجع جدا فكرة طرح موضوع الفيلم من بدرى , أنا أصلا مستعد لو الناس اتجمعت فى مكان و علرضت الفيلم تتفرج عليه و تتكلم عليه , أنا مستعد آجى من اسكندرية علشان حاجة كده ( لو الفيلم يستاهل :))) )ء

walladshab said...

I think I am one of the biggest fans of fight club,I watched it more than 153 times,I started a fanclub with my friends in egypt for fight club,this movie is one of the best and most important movies in history.